MR.MWALIMU.BLOGSPOT.COM NI ELIMU KWANZA

                                            
“Mungu akitaka jambo huwa hata kama watu hawalitaki. Mungu asipolitaka jambo haliwi hata kama watu wakalitaka kiasi gani”.Nina furaha kuchukua fursa hii kumshukuru mwenyezi Mungu kwa kuniweza kuanza kwa Blog hii ambayo nina hakika itachangia sana maendeleo ya sekta elimu nchini Tanzania. Maendeleo ya elimu yatakuwa mbegu na chachu ya ustawi wa mtu mmoja mmoja , familia, jamii na hata Taifa kwa ujumla.

Nina mshukuru kwa sababu bila yeye mimi sina ninachoweza, wala siwezi kufikiria jambo lolote jema lenye manufaa, hata nikifikiri jambo jema sina maarifa na nguvu ya kulitekeleza.Bila yeye mimi ni dhaifu na dhoofuli hali. Bila yeye mimi nisingekuwepo, wewe usingekuwepo. Nini yeye ametupa ufahamu timamu, ametuwezesha kuona, kusikia na hata kusema.

Nawashukuru pia watu walio nitia moyo na kuniombea katika kufanikisha adhima yangu ya kuwa na blog. Kwa pekee kabisa namshukuru ndugu George Akilimali ambaye ameshiriki kusanifu Blog hii na wote waliochangia mawazo kwa namna moja au nyingine akiwemo ndugu Athur Davie ,raia wa Austria ambaye kwa sasa anaishi nchini, aliyenisaidia kuanza blog ya kwanza mwaka 2014, japo haijadumu lakini ilifungua ufahamu na kuniongezea shauku ya kuunda blog hii.

Lengo la Blog hii ya Mr Mwalimu Blogspot.com ni kuwa jukwa huru la kujadili changamoto za kielimu katika hali ya kujenga. Iko wazi sekta ya elimu ndiyo sekta mama lakini kwa miaka mingi mambo hayaendi vizuri katika sekta hiyo. Kama inavyofahamika kudumaa kwa elimu ni kuduma kwa kila maendeleo hivyo lazima zifanyike jitihada za kusisimua elimu yetu.

Jukwa hili huru la kujadili changamoto, litakuwa pia sehemu ya kuwasilisha hoja za msingi na zenye tija katika sekta ya elimu. Ni sehemu pia ya kutoa ushauri wowote ambao utawezesha kuleta chachu ya maendeleo ya kielimu.

Ukosoaji wenye tija katika elimu na wenye ukweli na si wenye kuzaliwa kwenye hisia za juju juu utapewa nafasi. Kuna mengi ya ya kuibua na kukosa ili Taifa listawi. Bila dhamira mbaya tutakosoa sera, mikakati, uendeshaji na utawala wowote wa kielimu ambao hauna tija kwa nchi.

Kwa kuwa Blog hii ni jukwaa huru, msomaji yeyote, mdau wa elimu yeyote, mwalimu, mwanafunzi, mzazi au mlezi yeyote ataruhusiwa kutoa hoja yake aliyonayo. Mtu mwenye andiko lenye tija atawasiliana nami kipitia namba tajwa hapo juu au email tajwa.

Atatuma andiko lake na baada ya kuhaririwa litachapishwa likiwa na jina la mwandishi husika. Hivyo ni sehemu pia ya kuendeleza vipaji vya uandishi kwa watu walionavyo. Ukiwa na chochote chenye kujenga elimu, usisite kuwasiliana nami.

Jukwa hili litakuwa sehemu ya kujifunza, kushauri, kuonya, kukosoa na kuibua mijadala ya kielimu, wakati huo huo itakuwa sehemu ya kufurahi kupitia kategoria ya kihoja. Hapo vitapatika vihoja mbali mbali vilivyotokea katika mazingira ya utoaji elimu. Jukwaa hili litakuwa pia mahala pa kubadilishana uzoefu kwa wadau wote wa elimu na kujipatia taarifa za kielimu.

Kwa kuwa suala la uhamisho kwa walimu ni moja ya changamoto kubwa, mwalimu mwenye kutaka kuweka tangazo lake katika Blog hii ataruhusiwa, lakini atalipia shilingi elfu tano, 5000/,Blog itamtengenezea tangazo na kuliweka katika kategoria ya Uhamisho.

Naomba nimalize kwa kunukuu kauli aliyotoa mkuu wa mkoa wa Ruvuma, katika sherehe za siku ya walimu duniani, ndugu Briliant Mahenge ,alisema “Tutaendelea kuwa maskini kama hatutawekeza kwenye elimu”.

Kipaumbele cha kwanza kwa nchi maskini ni utoaji wa elimu bora, ni kuelimisha watu wake na si vinginevyo. Hivyo kwa kauli moja Blog hii ni jukwa la kutetea elimu ipewe kipaumbele cha kwanza.

Uwekezaji wa kwanza kwenye elimu ni kutoa mawazo yenye kujenga ambayo yataamsha hamasa ya viongozi wanchi katika kuboresha elimu. Hiyo ndiyo haswa kazi ya Blog hii kuisemea sekta ya elimu bila woga wala kujipendekeza kwa yoyote.     Elimu Kwanza.

Share this

mrteacher